काठमाण्डौ । राष्ट्रपति रामचन्द्र पौडेलले संविधान बमोजिम पूर्वप्रधानन्यायधीश सुशीला कार्कीलाई प्रधानमन्त्री नियुक्त गरेका छन् । सुशीला कार्कीले भदौ २७ गते शुक्रबार साँझ प्रधानमन्त्रीको शपथ ग्रहण गरेसँगै ६ महिनाभित्र चुनाव गर्ने योजना अगाडि सारिएको छ । अन्ततः देशले पाँच दिन लामो तनावपछि जेनजी पुस्ताको प्रस्ताव अनुरुप नयाँ प्रधानमन्त्री पाएको हो ।
राष्ट्रपति कार्यालयले विज्ञप्ति जारी गर्दै मुलुकमा उत्पन्न विषम तथा असाधरण परिस्थितिलाई सम्बोधन गर्दै युवा पुस्ताद्वारा प्रकट गरिएको इच्छा र आकांक्षा अनुसार सुशीला कार्कीलाई प्रधानमन्त्री नियुक्त गरिएको भनेको छ । राष्ट्रपति रामचन्द्र पौडेलले शुक्रबार अबेर प्रधानमन्त्री नियुक्त गरेपछि बेलुकी नै पूर्वप्रधानन्यायाधीश कार्कीले शपथ ग्रहण गरेकी छन् ।
शपथ ग्रहण समारोहमा जेनजी पुस्ताको बाक्लो उपस्थिति रह्यो । पूराना राजनीतिक दलका नेताहरू नगन्यरुपमा उपस्थित सभामा कार्कीले जेनजी युवाहरूको हात समाउँदै अर्थपूर्ण तस्वीर समेत खिचाएकी छन् । शपथ ग्रहण समारोहमा राष्ट्रपति कार्यालयका सचिव दिपक काफ्लेले कार्की नेतृत्वको सरकारले ६ महिनाभित्र चुनाव गराउने समेत उल्लेख गरेका छन् ।
राष्ट्रपति कार्यालयले विज्ञप्तिमा राजनीतिक दल तथा सरोकारवालाहरूसँग परामर्श समेतका आधारमा संविधान बमोजिम राष्ट्रपतिका अन्तरनिहीत संवैधानिक अधिकार प्रयोग गरेर कार्कीलाई नियुक्त गरिएको उल्लेख गरेको छ । संविधानको पालना र संरक्षण एवं नेपालको राष्ट्रिय एकताको प्रवद्र्धन गर्न आवश्यक भएकाले राष्ट्राध्यक्षको हैसियतले यो निर्णय लिएको बताइएको छ ।
Discussion about this post