काठमाण्डौ । जेनजी प्रदर्शनको क्रममा झण्डै २ दर्जन होटलमा ठूलो क्षति पुगेको छ । होटल संघ नेपालले विज्ञप्तिमार्फत यसै भदौ २३ र २४ गते प्रदर्शनकारीले गरेको आन्दोलनको क्रममा झण्डै २ दर्जन होटलहरूमा ठूलो क्षति पुगेको जनाएको छ ।
प्रारम्भिक जानकारी अनुसार झण्डै २ दर्जन होटलमा क्षति पुग्दा करिब २५ अर्बको नोक्सानी भएको बताएको हो । संघका अनुसार काठमाडौं, पोखरा, बुटवल, भैरहवा, झापा, मोरङ विराटनगर, धनगढी, महोत्तरी, दाङ तुल्सीपुर लगायतका क्षेत्रमा सञ्चालित स्वदेशी तथा विदेशी ब्राण्डका होटलहरूमा प्रत्यक्ष क्षति पुगेको हो ।
होटलहरुमा तोडफोड, आगजनी र लुटपाट भएको छ । ‘काठमाडौंमा रहेको हिल्टन होटलको मात्रै ८ अर्ब भन्दा बढीको क्षति भएको छ,’ संघले भनेको छ, ‘यो सँगै देशभरी करिब २५ अर्ब भन्दा बढी आर्थिक क्षति भएको प्रारम्भिक अनुमान छ ।’ यसबाट प्रभावित होटलहरु मर्मत सम्भार र पुनर्निर्माण नगरी सञ्चालनमा आउन नसक्ने अवस्थामा छन् ।
यसका कारण करिब दुई हजारभन्दा बढी कामदार कर्मचारीको चाडपर्वको समयमा रोजिरोटीमा समेत प्रत्यक्ष प्रभाव परेको छ । साथै हाल सञ्चालन अवरुद्ध भएका यी होटलहरुले व्यहोर्नु पर्ने बैंक–वित्तीय संस्था लगायतका आर्थिक दायित्व नियमित रुपमा बुझाउन असमर्थ रहने देखिएको छ ।
Discussion about this post