टेक्नोलोजीको अग्रणी माइक्रोसफ्ट कम्पनीले यस बर्ष ६ हजार कर्मचारी कटौती गर्ने घोषणा गरेको छ । उसले मंगलबार यो घोषणा गरेसँगै विश्वव्यापी रूपमा कम्पनीले ३ प्रतिशत कर्मचारीलाई हटाउने भएको हो । यो निर्णय सबै तह अर्थात जुनियरदेखि वरिष्ठ व्यवस्थापनसम्म र सबै भौगोलिक क्षेत्रको हकमा लागू हुनेछ ।
माइक्रोसफ्टमा जुन २०२४ सम्म करिब २ लाख २८ हजार कर्मचारीहरू कार्यरत थिए । अब यो निर्णयसँगै करिब ६ हजार ८ सय कर्मचारीहरूले यस कम्पनीबाट रोजगारी गुमाउन सक्छन् । सन् २०२३ मा १० हजार कर्मचारीको कटौती पछिको यो सबैभन्दा ठूलो कटौती मानिएको छ ।
माइक्रोसफ्टले बताए अनुसार, हामी संगठनात्मक परिवर्तनहरू गर्दैछौं, जसले कम्पनीलाई परिवर्तनशील बजारमा सफल हुनको लागि राम्रो स्थान दिनेछ ।
माइक्रोसफ्टले यो पटकको लेअफ कार्यसम्पादनमा आधारित नभएको वा जागिर गुमाइरहेका व्यक्तिलाई कामका कारण बर्खास्त नगरिएको स्पष्ट पारेको छ । कम्पनीको उद्देश्य व्यवस्थापनका तहहरू घटाएर कामलाई थप सरल बनाउनु हो ।
चाखलाग्दो कुरा के छ भने, माइक्रोसफ्टले अप्रिल २०२४ मा आफ्नो त्रैमासिक नतिजामा अपेक्षाभन्दा राम्रो प्रदर्शन गरेको थियो र कम्पनीको प्रक्षेपण पनि सकारात्मक थियो । तैपनि छाँटकाँटहरूले देखाउँछ कि माइक्रोसफ्ट आफ्नो स्रोतहरू अझ प्रभावकारी रूपमा प्रयोग गर्न चाहन्छ ।
माइक्रोसफ्टको शेयर गत सोमबार यस बर्षको उच्च ४४९.२६ डलरमा पुगेर बन्द भएको थियो, यो वर्ष अहिलेसम्मकै उच्च स्तर हो । कम्पनीको शेयर जुलाई २०२३ मा रेकर्ड ४६७.५६ डलरसम्म पुगेको थियो ।
Discussion about this post